ЛІСТ КАЛАСЯНАМ СЬВЯТОГА АПОСТАЛА ПАЎЛА

<h4> 1</h4>
<p>1 Павал, з волі Божай апостал Езуса Хрыста, і Цімафей, брат,
<p>2 сьвятым і веручым братам у Хрысьце Езусе, пражываючым у Калосах: Ласка вам і супакой ад Бога, Айца нашага.
<p>3 Дзякуем Богу і Айцу Госпада нашага Езуса Хрыста, заўсёды молячыся за вас
<p>4 і чуючы пра веру вашу ў Хрыста Езуса і пра любоў, якую маеце да ўсіх сьвятых,
<p>5 дзеля надзеі, што запэўнена вам у небе, аб якой чулі вы ў слове праўды Эвангельля,
<p>6 якая дайшла да вас, як і разыйшлася па ўсім сьвеце і дае плады, і расьце, як і ў вас ад таго дня, у якім вы пачулі ды пазналі ласку Божую ў праўдзе,
<p>7 як вас навучыў Эпафрас, супрацоўнік наш найдаражэйшы, верны для вас слуга Езуса Хрыста,
<p>8 які таксама апавясьціў нас пра вашую любоў у Духу.
<p>9 Таму і мы ад таго дня, у якім гэта пачулі, не перастаём за вас маліцца і прасіць (Бога), каб вы напоўніліся пазнаньнем волі Ягонай у-ва ўсякай мудрасьці і духовым разуменьні,
<p>10 і каб паступалі дастойна Бога, у-ва ўсім Яму падабаючыся, прыносячы плод у кожным добрым дзеяньні і ўзрастаючы ў пазнаньні Бога,
<p>11 дужэючы ўсякай сілаю паводле магутнасьці славы Ягонай у-ва ўсякай цярплівасьці і велікадушнасьці,
<p>12 з радасьцю дзякуючы Айцу, які ўчыніў нас дастойнымі ўдзельнічаць у лёсе сьвятых у сьвятле,
<p>13 які вырваў нас з улады цемры і перанёс нас у каралеўства Сына ўмілаванага свайго,
<p>14 у якім атрымалі мы адкупленьне і адпушчэньне грахоў.
<p>15 Ён (Хрыстос) ёсьць вобраз нябачнага Бога, Пяршак усяго стварэньня,
<p>16 бо ў Ім заснована ўсё, што ёсьць у небе і на зямлі, бачнае і нябачнае, ці то троны, ці то валаданьні, ці начальствы, ці улады. Усё праз Яго і ў Ім створана,
<p>17 і Ён ёсьць перад усімі, і ўсё ў Ім існуе.
<p>18 І Ён — Галава цела Царквы; Ён — пачатак, пяршак з мёртвых, каб у-ва ўсім Ён быў першым,
<p>19 бо спадабалася (Богу), каб у Ім прабывала ўсякая поўня,
<p>20 каб праз Яго ўсё пагадзіць з сабою, ці што на зямлі, ці што ў небе ёсьць, робячы мір кроўю крыжа Ягонага.
<p>21 І вас, што былі калісьці чужымі і ворагамі дзеля схільнасьці да ліхіх учынкаў,
<p>22 цяпер пагадзіў у целе сьмерцю цела свайго, каб бачыць вас перад сабою сьвятымі, беззаганнымі і бездакорнымі,
<p>23 калі толькі застанецеся моцнымі верай, стойкімі і непарушнымі ў надзеі Эвангельля, якое вы чулі, якое абвяшчаецца ўсяму сьвету, якога я, Павал, стаўся слугою.
<p>24 Цяпер радуюся я з пакутваньняў за вас і дапаўняю тое, чаго нестае Хрыстовым мукам, у сваім целе за Цела Ягонае, якім ёсьць Царква,
<p>25 каторай я стаўся слугою за пастановай Божай, дадзенай мне адносна вас, каб я споўніў слова Божае,
<p>26 тайну, схаваную ад вякоў і пакаленьняў, а цяпер выяўленую Ягоным сьвятым,
<p>27 якім захацеў Бог выявіць багацьці хвалы гэтае тайны сярод паганаў, каторая (тайна гэтая) ёсьць Хрыстос між вамі як надзея хвалы.
<p>28 Яго абвяшчаем мы, навучаючы кожнага, і вучачы кожнага чалавека ў-ва ўсякай мудрасьці, каб зрабіць кожнага чалавека дасканалым у Хрысьце.
<p>29 Дзеля гэтага я і труджуся, ваюючы пры Яго дапамозе, якою Ён ў-ва мне дзейнічае магутна.

<h4> 2</h4>
<p>1 Хачу вось, каб вы ведалі, якую руплівасьць я маю дзеля вас і адносна тых, што ў Ляодыцэі, і дзеля тых, што ня бачылі мяне асабіста,
<p>2 каб парадаваліся сэрцы іхнія, навучаныя ў любові і для поўнага ўзбагачэньня розуму, дзеля пазнаньня тайны Бога — Хрыста,
<p>3 у якім усе скарбы мудрасьці і веданьня схаваны.
<p>4 Гэта вам кажу, каб ніхто вас не падмануў падступнымі словамі.
<p>5 Бо хаця я далёка целам, але духам я з вамі, радуючыся і бачачы парадак ваш і цьвёрдасьць веры вашай у Хрыста.
<p>6 Дык як вы прынялі Езуса Хрыста, Госпада, у Ім і жывіце,
<p>7 укарэненыя і ўбудаваныя ў Яго, і ўзмоцненыя ў веры, як і былі навучаныя, поўныя ўдзячнасьці Яму.
<p>8 Глядзіце, каб не збаламуціў вас хто сваёй філязофіяй і пустым ашуканствам паводле звычаю людзей, паводле стыхіяў сьвету, а не паводле Хрыста.
<p>9 У Ім бо прабывае ўся паўната Боства цялесна,
<p>10 і вы напоўнены ў Ім, які ёсьць галава ўсякага начальства і ўлады.
<p>11 У Ім вы атрымалі і абразаньне не рукой зробленае праз абрэзку часткі цела, але абразаньне Хрыстовае,
<p>12 пахаваныя з Ім у хросьце, з Ім і ўваскрэсьлі праз веру ў моц Бога, які ўваскрасіў Яго з памёршых.
<p>13 І вас, мёртвых праз грахі і неабразаньне цела вашага, ажывіў вас з Ім, дараваўшы нам усе грахі,
<p>14 скасаваўшы напісанае рукою асуджаючае нас, што было супраць нас, і узяў Яго з-паміж нас і прыбіў да крыжа;
<p>15 раззброіўшы начальствы і ўлады, выставіў іх адважна на відовішча, трыюмфуючы над імі ў Ім.
<p>16 Дык хай ніхто вас не асуджае за яду або пітво, або з прычыны дня сьвяточнага, ці маладзіка, ці суботы,
<p>17 каторае ёсьць ценем будучага, цела ж — Хрыстовае.
<p>18 Ніхто хай не пазбавіць вас нагароды, маючы ўпадабаньне ў прыніжэньні сябе і кульце анёлаў, зьвяртаючы ўвагу на тое, што бачыў, марна пышаючыся розумам цела свайго
<p>19 і не трымаючыся галавы, ад каторай усё цела, саставамі і вязямі злучанае і змацаванае, расьце узрастаньнем Божым.
<p>20 Дык калі вы памярлі з Хрыстом для стыхіяў гэтага сьвету, чаму ж, быццам жывучы яшчэ ў сьвеце, падчыняецеся вы пастановам:
<p>21 “Не чапай, не каштуй, не дакранайся”?
<p>22 Гэта ўсё праз само карыстаньне вынішчаецца, згодна з прыказаньнямі і навукамі чалавечымі.
<p>23 Гэта мае толькі выгляд мудрасьці ў самавольным служэньні, у пакорлівасьці, у мардаваньні цела, у непашане да таго, што насычае цела.

<h4> 3</h4>
<p>1 Дык калі вы ўваскрэсьлі з Хрыстом, шукайце таго, што ўгары ёсьць, дзе Хрыстос сядзіць праваруч Бога,
<p>2 пра ўзгорнае думайце, а не пра зямное.
<p>3 Бо вы — памёршыя, і жыцьцё ваша пахаванае з Хрыстом у Богу!
<p>4 Калі аб’явіцца Хрыстос, жыцьцё вашае, тады і вы аб’явіцеся з Ім у хвале.
<p>5 Дык мярцьвіце тады члены вашыя, што на зямлі: распусту, нячыстасьць, любежнасьць, юр, ліхія пажаданьні і сквапнасьць, якая ёсьць ідалапаклонства,
<p>6 праз якія надыходзіць гнеў Божы на дзяцей недаверства,
<p>7 сярод якіх і вы калісьці хадзілі, калі былі між імі.
<p>8 Але цяпер адкіньце ўсё гэта: гнеў, мсьцівасьць, злосьць, блюзьнерствы і брыдкія словы з вуснаў вашых. 
<p>9 Не хлусіце адзін аднаму, скінуўшы з сябе старога чалавека з яго ўчынкамі
<p>10 і прыадзеўшыся ў новага, які ўсьцяж аднаўляецца ў пазнаньні па ўзору Таго, які яго стварыў,
<p>11 дзе ўжо няма Грэка і Юдэя абразанага ці неабразанага, барбара, Скіта, вольнага і нявольніка, але ўсё і ва ўсім Хрыстос.
<p>12 Дык адзеньцеся як выбраньнікі Божыя, сьвятыя і ўмілаваныя, у сэрца спагаднае, ласкавасьць, пакорлівасьць, сьціпласьць, цярплівасьць,
<p>13 церпячы адны адных і прабачаючы адны адным, калі хто да каго мае жаль; як і Госпад дараваў вам, так і вы.
<p>14 А па-над усё мейце любоў, якая ёсьць вузлом дасканаласьці.
<p>15 А супакой Хрыстовы, да якога вы і пакліканыя ў адным целе, хай пануе ў сэрцах вашых. І будзьце ўдзячныя.
<p>16 Хай шчодра прабывае ў вас Слова Божае, каб з усёю мудрасьцю адны адных навучалі і напаміналі ды каб у ласцы ў сэрцах вашых сьпявалі вы Богу псальмы, гімны і песьні духоўныя.
<p>17 І ўсё, што робіце словам ці дзеяньнем, усё (рабіце) ў імя Госпада Езуса, дзякуючы праз Яго Богу Айцу.
<p>18 Жонкі, будзьце паслухмянымі мужам, як належыцца ў Госпадзе. 
<p>19 Мужы, любіце жонак вашых і ня будзьце для іх прыкрымі.
<p>20 Дзеці, слухайце бацькоў у-ва ўсім, бо гэта падабаецца Госпаду.
<p>21 Бацькі, не раздражняйце дзяцей вашых, каб яны не адчувалі крыўды.
<p>22 Нявольнікі, слухайцеся ў-ва ўсім гаспадароў цялесных, не для вока служачы, каб людзям падабацца, але ў прастаце сэрца, баючыся Бога.
<p>23 Усё, што ня робіце, ад душы рабіце, як Богу, а ня людзям,
<p>24 ведаючы, што ў Госпада атрымаеце ў нагароду спадчыну, бо вы служыце Госпаду Хрысту.
<p>25 Хто крыўдзіць, атрымае тое, на што заслужыў, бо (ў Бога) няма ўзіраньня на асобу.

<h4> 4</h4>
<p>1 Гаспадары, аддавайце нявольнікам тое, што ім справядліва і па праву належыцца, ведаючы, што і вы маеце Госпада ў небе.
<p>2 Трывайце ў малітве, чувайце ў ёй з падзякаю,
<p>3 молячыся поруч і за нас, каб Бог адчыніў нам дзьверы слова, каб выказаць таямніцу Хрыстовую, дзеля якой я стаўся вязьнем,
<p>4 каб выявіць яе належна моваю.
<p>5 Адносна тых, што вонках, паступайце мудра, выкарыстоўваючы час. 
<p>6 Слова вашае хай будзе заўсёды ласкавае, прыпраўленае сольлю, каб вы ведалі, што каму адказаць.
<p>7 Пра мяне ўсё вам раскажа Тыхік, найдаражэйшы брат, і верны слуга, і супрацоўнік у Госпадзе,
<p>8 якога я паслаў да вас, каб ён даведаўся, як вашы справы, і пацешыў сэрцы вашыя,
<p>9 разам з Анісімам, умілаваным і верным братам, каторы з вашых; усё, што тут робіцца, яны раскажуць вам.
<p>10 Вітае вас Арыстарх, вязень разам са мной, і Марк, сваяк Барнабы, — адносна якога вы ўжо атрымалі даручэньні: калі прыбудзе да вас, прыміце яго, —
<p>11 і Езус, называны Юстам, які з абразаных; толькі яны адны — памагатары мае (у працы) для Каралеўства Божага; яны былі мне пацехаю.
<p>12 Вітае вас Эпафрас, што з вашых, слуга Хрыста Езуса, заўсёды руплівы ў малітвах за вас, каб сталіся вы дасканалымі і напоўніліся ўсякай воляй Божай.
<p>13 Сьведчу вам адносна яго, што шмат ён папрацаваў для вас і для тых, якія ў Ляодыцэі і Гераполісе.
<p>14 Вітае вас Лукаш, лекар найдаражэйшы, і Дэмас.
<p>15 Прывітайце братоў, якія ёсьць у Ляодыцэі, і Німфана, і царкву ў яго доме.
<p>16 І калі гэта пісьмо прачытаеце, зрабіце, каб і ў царкве Ляодыцэйскай было яно прачытана, а тое, што з Ляодыцэі, прачытайце і вы.
<p>17 І скажыце Архіпу: “Глядзі, каб выканаў паслугу, якую атрымаў ад Госпада”.
<p>18 Прывітаньне маёю рукой, Паўлавай. Памятайце пра кайданы мае. Ласка (хай будзе) з вамі.