Чацьвер (Тон 2) (Вячэрня, Ютрань)

СЕРАДА ЎВЕЧАРЫ

Быццам рэкі, што, разьдзяліўшыся, выплылі з раю, вы, мудрыя апосталы, напаілі ўсю зямлю. Заараўшы яе, вы пасеялі збавеннае прапаведаньне і зжалі буйнае калосьсе – душы збаўленых, якія вы, вучні Гасподнія, захавалі ў скарбніцы духоўнай, як найбольшы скарб.

Ад цемры пажадлівасьцяў і спакусаў шматпакутнае маё сэрца вызваліце, сьветачы духоўнага сьвітаньня і сьветлыя настаўнікі, што абвяшчаеце ўсім Сонца, якое разганяе спакусу ночы няверства. Як Ягоныя сьведкі, маліцеся, каб Ён прасьвятліў і нашыя розумы і пачуцьці.

Вы, сьведкі тайны, зьявіліся сапраўды боганапісанымі табліцамі новай ласкі і кнігамі духоўнымі, якія маюць у сабе збавеннае слова, напісанае Духам і пальцам Айца; абышоўшы ўсю зямлю, вы навучылі ясна людзей праўдзівай веры і паказалі ім сьцежку да неба.

Багародзічны. Слова, роўнае славаю з Айцом і Духам, што, быццам вялікае сонца, у апошнія дні на зямлі зазьзяла ад Дзевы Божай Нявесты, паслала вас, слаўныя апосталы, быццам зоркі, сьвятлом веры прасьвятліць усіх людзей, што жывуць у цемры спакусы, і прывесьці іх да праўдзівай веры.

Вершапесьні

Ты, Збавіцелю, узьвялічыў па ўсім сусьвеце імёны найвышэйшых апосталаў, бо яны, навучыўшыся нябесным справам, аздараўлялі людзей, і нават іхні цень лячыў немачы; рыбакі чынілі цуды і пакліканыя сярод юдэяў прапаведавалі ласку. Малітвамі іх, Міласэрны, даруй нам веліч Твайго зьмілаваньня.

Будучы заўжды пад націскам няправедных учынкаў, прыбягаем да Цябе, сапраўднага Бога і, маючы за заступнікаў вучняў Тваіх, молімся: "Збаў нас, Настаўнік, бо гінем! Пакажы ворагам нашым, што Ты ахоўваеш людзей Тваіх і збаўляеш нас ад бедаў малітвамі апосталаў, не зважаючы на грахі нашыя, у вялікай Тваёй дабрыні". Госпадзе, Слава Табе.

Вялікую славу здабылі вы, сьвятыя: ня толькі цярпеньнямі вы перамаглі ворага, але і пасьля сьмерці праганяеце злых духаў, аздараўляеце немачы, лекары душаў і целаў. Маліцеся Госпаду за збаўленьне душаў нашых.

Багародзічны. Быццам пладавітае аліўнае дрэва, Дзева ўзрасьціла Цябе, Плод жыцьцядайны, каб прыносіў сьвету веліч і багацьце зьмілаваньня.

ЧАЦЬВЕР РАНІЦАЙ

Сядальная песьня 1. У невыказным чалавекалюбстве Тваім, Хрысьце Божа, ты зрабіў рыбакоў мудрэйшымі за рытараў і паслаў іх прапаведнікамі па ўсёй зямлі. Умацуй праз іх Царкву Тваю, і дай верным блаславеньне Тваё, Адзіны, што сярод сьвятых спачываеш.

Сьведкі і вучні Мудрасьці Божае, боскія апосталы, выкрылі нямудрую мудрасьць мудрых і вучоных, прастатою прапаведаваньня навучылі народы мудра славіць адзінага Творцу і Госпада.

Слава... цяпер...

Узьвялічваем Цябе, Багародзіца, і клічам: Радуйся, Хмара незаходнага Сьвятла, Госпада Славы, якога Ты насіла ва ўлоньні сваім.

Сядальная песьня 2. Рыбакі злавілі народы сеткаю Духа, навучылі ўсе куткі сьвету пакланяцца Табе, разам з Айцом і Духам, Хрысьце Божа. Умацуй праз іх Царкву Тваю і пашлі верным Тваё блаславеньне, Адзіны Міласэрны і чалавекалюбны.

Паўтараем тое самае.

Верш. Дзіўны Бог у сьвятых сваіх...

Пакутнікі Хрыстовыя, блаславёная зямля, што напілася вашай крыві, і сьвятыя храмы, што прынялі вашыя целы. На судах вы выкрылі ворага і сьмела прапаведавалі Хрыста. Маліце Яго, Добрага, за збаўленьне душаў нашых.

Слава... цяпер...

Дзякуючы Табе, Багародзіца, мы сталіся саўдзельнікамі Боскай існасьці, бо Ты нарадзіла нам Бога ў целе. Дзеля гэтага мы Цябе, як належыць, з пашанаю ўзьвялічваем.

Вершапесьні

Ты, Збавіцелю, узьвялічыў па ўсім сусьвеце імёны найвышэйшых апосталаў, бо яны, навучыўшыся нябесным справам, аздараўлялі людзей, і нават іхні цень лячыў немачы; рыбакі чынілі цуды і пакліканыя сярод юдэяў прапаведавалі ласку. Малітвамі іх, Міласэрны, даруй нам веліч Твайго зьмілаваньня.

Будучы заўжды пад націскам няправедных учынкаў, прыбягаем да Цябе, сапраўднага Бога і, маючы за заступнікаў вучняў Тваіх, молімся: "Збаў нас, Настаўнік, бо гінем! Пакажы ворагам нашым, што Ты ахоўваеш людзей Тваіх і збаўляеш нас ад бедаў малітвамі апосталаў, не зважаючы на грахі нашыя, у вялікай Тваёй дабрыні". Госпадзе, Слава Табе.

Мноства сьвятых Тваіх моліць Цябе, Хрысьце: зьмілуйся над намі і збаў нас у чалавекалюбстве Тваім.

Слава... цяпер...

Усю надзею ўскладаю на Цябе, Маці Божая: захавай мяне пад покрывам Тваім.