Палова сьвята - Літургія

Трапар Паловы сьвята (тон 8). У палове сьвята сасьмяглую душу маю вадою набожнасьці напаі, Збавіцелю, бо Ты ж некалі ўсклікнуў да ўсіх: "Хто мае смагу, хай прыходзіць да Мяне і п'е". Крыніца жыцьця нашага, Хрысьце Божа, слава Табе.

Кандак Паловы сьвята (тон 4). Калі настала палова законнага сьвята, Ты, Творча ўсяго і Ўладару, Хрысьце Божа, сказаў прысутным: "Хадзіце, зачэрпніце вады несьмяротнасьці". Таму вось і мы прыходзім да Цябе і даверліва клічам: "Даброты Твае даруй нам, бо Ты – Крыніца жыцьця нашага".

Пракімен (Пс 146:5,1). Вялікі Госпад і ўсемагутны, і няма меры розуму Яго.

Верш. Слаўце Госпада, бо добра пець хвалу Яму, бо соладка славіць Бога нашага.

Апостал: Дзеяньні 14:6-18

Алілуя (Пс 73:2,12). Успомні народ Твой, які Ты ад пачатку прызначыў для сябе.

Верш. Бог – Уладар наш спрадвеку: Ён учыніў збаўленьне пасярод зямлі.

Евангельле: Ян 7:14-30

Задастойнік. Чужое маткам дзявоцтва, нечуванае сярод дзеваў дзетараджэньне: у Табе ж, Багародзіца, абедзьве рэчы сумясьціліся. За тое Цябе ўсе плямёны зямныя няспынна ўзьвялічваюць.

Прычасьнік. "Хто есьць Маё цела і п'е Маю кроў, ува Мне прабывае і Я ў ім," – кажа Госпад. Алілуя, алілуя, алілуя.