(Тон 8). Праводзячы жыцьцё ў пасьце і нядрэмнасьці, ты, маці пачэсная ..., атрымала ласку ачышчаць душэўныя і цялесныя хворасьці, нячыстыя духі Духам адганяць, і быць заступніцай у патрэбе. Дзеля гэтага малітвамі тваімі прасі аздараўленьня ўсім і велічы зьмілаваньня.

Месца, дзе ляжыць цела тваё, вяртае сьляпым зрок і дае ацаленьне ўсім хворым, якія з вераю прыходзяць да цябе і просяць наведаць іх, маці сьвятая і цудамі слаўная .... Дык малітвамі тваімі выпрасі для нас велічы зьмілаваньня.

Ты была поўная міласэрнасьці да бліжняга, стойкая ў веры праўдзівай і любові да Бога, блаславёная пачэсная маці .... Дзеля гэтага Божая ласка спачыла на табе. Малітвамі тваімі захавай у басьпецы тых, што з вераю славяць цябе.

Багародзічны (тон 8). Агорнутыя сумам, молім Цябе, Усячыстая заступніца нашая: “Ня дай згінуць слугам Тваім, але пасьпяшыся вызваліць нас ад цяперашняга гневу і суму, бо Ты, Багародзіца чыстая і блаславёная, што зьмясьціла ў сабе Бога, – нашая абаронная сьцяна і верная памочніца ў патрэбе”.

Крыжабагародзічны (тон 8). Бачачы, як Ты быў прыбіты да крыжа і дабравольна цярпеў мукі, Дзева і Маці Твая, Уладару, усклікнула: “Гора мне, Дзіця маё любае! Як гэта Ты, Лекару, які аздаравіў людзкія немачы і міласэрнасьцю Тваёю ад тленнасьці выбавіў усіх, церпіш несправядліва раны?”

Адпушчальны трапар

(Тон 8). У табе, маці, верна захавася вобраз Божы: узяўшы крыж, ты пайшла ўсьлед за Хрыстом і на справе навучала не клапаціцца аб целе, бо яно прамінае, але дбаць пра душу, рэч несьмяротную. Дзеля гэтага разам з анёламі радуецца, сьвятая ..., дух твой.