(Тон 4). Дзевы чыстыя, зьяднаныя ў любові Творцы, вераю разарвалі путы спакусы і патапталі мужна бясьсільнага ворага; упрыгожыўшыся сьветлымі вянкамі перамогі, радуюцца цяпер у духоўным хораме Жаніха.

Не спалохаўшыся агню, розных мукаў і сьмерці, усепачэсныя дзевы, што шукалі вераю дабрыню найпрыгожага Жаніха, упрыгожыліся шматлікімі ранамі і з Ім зьядналіся. Дзеля гэтага Ісус Чалавекалюбец і Збавіцель душаў нашых абдарыў іх багатымі дарамі.

Дзявоцтва нятленнае, дзявоцтва дзіўнае, вы, добрыя дзевы, прынесьлі ў дар Хрысту, сілаю крыжа і мужным розумам перамогшы напады і спакусы нязбожных. Таму ўсе цэрквы Хрыстовыя спраўляюць вашую сьветлую і слаўную памяць.

Багародзічны (тон 4). Ты, Усячыстая, ніколі не перастаеш маліцца Госпаду і заступацца за нас: дык прашу Цябе, суцішы хваляваньні няшчаснае мае душы, разгані сум сэрца майго і розум мой узвысі, каб я мог славіць Цябе.

Крыжабагародзічны (тон 4). Убачыўшы Цябе, Ягнё і Пастыра, на крыжы, Маці Твая з плачам усклікнула: “Сыне жаданы мой, як гэта Ты, даўгацярплівы, быў павешаны на дрэве крыжовым? Як гэта рукі і ногі Твае, Слова, былі прыбітыя беззаконнымі, і як Ты, Уладару, праліў кроў сваю?”

Адпушчальны трапар

(Тон 1). Авечкі духоўныя, вы прайшлі шлях жыцьця, захаваўшы веру, і прыйшлі праз мучэньні да Ягняці і Пастыра Хрыста. Дзеля гэтага з радаснай душою спраўляем сёньня вашую пачэсную памяць і ўзьвялічваем Госпада.