(Тон 4). Прасьветленая духоўным сьвятлом, ты палічыла за нішто гэты сьвет, палюбіўшы адзінае валадарства, і, пацярпеўшы бязьмерныя мукі, зьнішчыла ворага і спляла сабе пераможны вянок, ... мучаніца ўсяслаўная.

Жаданьні цялесныя і полымя граху, ты, пачэсная, патушыла расою Боскага Духа, які садзейнічаў табе; ты ўтаймавала лютага зьвера і, аддаўшы мужна цела на мучэньні, спляла сабе пераможны вянок, ... ўсяслаўная.

Ні меч, ні агонь, ні раны, ні боль і сум, ні ўсякія віды мучэньняў не прытупілі ў табе жаданьня быць з Госпадам; імкнучыся да Яго ўсім палымяным сэрцам тваім, ты, мучаніца ..., адкінула ўсё бачнае і ўвайшла ў боскія харомы, стаўшыся нявестаю Ўладара ўсіх.

Багародзічны (тон 4). Няспыннай малітвай Тваёй да Госпада і магутным заступніцтвам адгані, Усячыстая Дзева, малю Цябе, варожыя напады, суцішы хваляваньні душы маёй, дай суцяшэньне сумнаму сэрцу майму і прасьвятлі розум, каб я мог дастойна славіць Цябе.

Крыжабагародзічны (тон 4). Убачыўшы Цябе, Ягнё і Пастыра, на дрэве, Маці Твая заплакала і ўсклікнула: “Сыне мой найдаражэйшы, як гэта ты, даўгацярплівы, быў павешаны на дрэве крыжовым? Як гэта беззаконныя прыбілі цьвікамі ногі і рукі Твае, Слова; і як гэта Ты, Уладару, праліў кроў сваю?”

Адпушчальны трапар

(Тон 4). Ягнё Тваё, Ісусе, ..., кліча моцным голасам: “Цябе, Жаніх мой, люблю і, Цябе шукаючы, мукі перанашу, і расьпінаюся з Табою, і пахаваньне прымаю ў хрышчэньні Тваім, і цярплю за Цябе, каб панаваць з Табою, і паміраю за Цябе, каб з Табою жыць; Ты ж прымі мяне, як ахвяру чыстую, што з любоўю прыносіцца Табе”. Малітвамі яе, Міласэрны, збаў душы нашы.