(Тон 8). У добрым змаганьні вы мужна супрацівіліся нападам мучыцеляў, душы свае з любоўю аддалі пад меч і, атрымаўшы мучаніцкія вянцы, былі залічаныя да хораў анельскіх. Вялікія вашыя цярпеньні, большая ўзнагарода. Маліцеся за душы нашыя.

Пажыўшы добра, вы, сьвятыя, у муках паказалі адвагу сваю: за нішто палічыўшы цярпеньні, пастом вы прасьвятлілі вашы целы і з любоўю пралілі кроў, каб разам атрымаць узнагароду за цярпеньні вашы. Маліцеся за душы нашыя.

Сьвятыя мучанікі, вы добра і мужна змагаліся, пагардзіўшы дачасным жыцьцём і адкінуўшы цялесную мудрасьць. Памёршы дзеля Хрыста, вы цяпер жывеца разам з анёламі. Шануем вашую памяць і просім вас маліцца Госпаду за збаўленьне душаў нашых.

Багародзічны (тон 8). Да каго ты сталася падобнаю, няшчасная душа мая, чаму ня хочаш узьнесьціся да пакаяньня і не баішся пакараньня, якое чакае цябе? Устань хутчэй, пакліч Адзіную хуткую на заступніцтва, і кажы “Малі, Дзева Маці, Сына Твайго і Бога нашага, каб Ён выбавіў мяне ад сеці хітрага ворага”.

Крыжабагародзічны (тон 8). Агніца, убачыўшы Ягнё, дабравольна расьпятае на крыжы, прашытая болем і па-матчынаму заплакаўшы, казала: “Што гэта за страшнае зьявішча, Сыне мой? Як гэта паміраеш Ты, доўгацярплівы Госпадзе, што даеш усім жыцьцё і ўваскрасеньне? Слаўлю Тваю, Божа мой, бязьмежную спагадлівасьць”.

Адпушчальны трапар

(Тон 4). Божа айцоў нашых, Ты паступаеш з намі з Тваёй заўсёднай лагоднасьцю: не пераставай быць спагадлівым да нас, але малітвамі іх кіруй у супакоі нашым жыцьцём.