Аўторак (Тон 1) (Вячэрня, Ютрань)

ПАНЯДЗЕЛАК УВЕЧАРЫ

Усё жыцьцё маё, Госпадзе, я, няшчасны, сорамна змарнаваў, і цяпер, як блудны сын, са скрухаю сардэчнаю клічу: "Ойча нябесны, зграшыў я, ачысьці і збаў мяне, і не адкінь мяне, які сам аддаліўся ад Цябе і, чынячы бясплодныя ўчынкі, зьбяднеў".

Багаты, Ты, Хрысьце, стаўся бедным, каб узбагаціць людзей несьмяротнасьцю і сьвятлом; дык і мяне, у асалодах жыцьцёвых зьбяднелага, узбагаці дабрадзейнасьцямі, дай мне ўдзел разам з убогім Лазарам і вызваль ад лёсу багача і пякельнага агню, які чакае мяне.

Я вельмі багаты на ўсё благое, палюбіў раскошу і ў гэтым жыцьці атрымаў дабро, Госпадзе, і на агонь пякельны заслужыў, бо пагардзіў маім галодным розумам, быццам Лазарам, і пакінуў яго перад варотамі Тваіх боскіх дабрадзейнасьцяў. Але Ты, Госпадзе, зьмілуйся нада мною.

Багародзічны. Багародзіца Дзева, разам з Прадвесьнікам, які прапаведаваў усім Ягнё, што ўзяло на сябе грахі ўсяго сьвету, маліце Госпада, каб мне, нягоднаму, пазьбегнуць лёсу казлоў у судны дзень, але апынуцца ў ліку авечак па правай руцэ Яго.

Вершапесьні

Быццам бездань марская, незьлічоныя мае бясчынствы, Збавіцелю, і я таплюся ў грахох; але Ты, Божа, працягні збавенную руку Тваю, як некалі Пятру, і зьмілуйся нада мною.

Мае паганыя думкі і благія ўчынкі асудзілі мяне, Збавіцелю, але Ты, Божа, дай мне духа каяньня, каб я мог усклікнуць Табе: "Збаў мяне, Дабрачынца мой, і зьмілуйся нада мною".

Вашыя вызнаньні на судзе, сьвятыя, дэманаў запалохалі і вызвалілі людзей ад маны; калі вас забівалі, вы клікалі: "Няхай ахвяра душаў нашых будзе прыемнай Табе, чалавекалюбны Госпадзе, бо мы, палюбіўшы Цябе, ня дбаем пра жыцьцё дачаснае".

Багародзічны. Майсей прароцкімі вачыма бачыў Цябе, Дзева ўсяхвальная, у вобразе незгаральнага куста, бо Боскі агонь не спаліў Твайго, Чыстая, улоньня. Дзеля гэтага просім Цябе, Маці Бога нашага, выпрасіць сьвету супакой і веліч зьмілаваньня.

АЎТОРАК РАНІЦАЙ

Першая сядальная песьня. Я, блудны, быў зачаты ў беззаконьнях, і ня сьмею глянуць на вышыню небесную, але спадзяюся на Тваё чалавекалюбства і клічу: Божа, ачысьці і збаў мяне!

Верш. Госпадзе, у ярасьці Тваёй не судзі мяне і ў гневе Тваім не карай мяне.

Калі праведнік збаўляецца з цяжкасьцю, дык што будзе са мною, грэшным, які не перанёс цяжару і сьпёкі дня? Але Ты, Божа, залічы мяне да наёмнікаў адзінаццатай гадзіны і збаў мяне.

Маючы непарушную сьцяны ў Табе, Багародзіца Марыя, прыйдзіце, верныя, прыпадзем да Яе, бо Яна мае вялікую сьмеласьць маліцца да Таго, хто нарадзіўся ад Яе, і выбаўляць ад гневу і сьмерці душы нашыя.

Другая сядальная песьня. Сьпяшайся прыняць мяне ў Твае бацькоўскія абдымкі: я ў блудзе правёў маё жыцьцё, і цяпер гляджу на невычэрпнае багацьце Тваіх дабротаў, Спасе. Не пагардзі маім зьбяднелым сэрцам, бо да Цябе, Госпадзе, прачула ўсклікаю: Зграшыў я, Ойча, на неба і перад Табою, збаў мяне!

Верш. Госпадзе, у ярасьці Тваёй не судзі мяне і ў гневе Тваім не карай мяне.

Убачыўшы багацьце дабрадзейнасьцяў Ёва, вораг праведнікаў зажадаў падкапаць і ўкрасьці іх. Ён разбурыў стоўп цялесны, але духоўнага скарбу ня ўкраў, бо знайшоў душу беззаганнага ўзброенаю; затое мяне, агаліўшы, узяў у палон. Перш як прыйдзе канец, вызвалі мяне, Збавіцелю, ад хітрага і збаў мяне.

Верш. Дзіўны Бог у сьвятых сваіх, Бог Ізраіля.

Як добрыя воі, аднадушныя ў веры, вы, сьвятыя, не збаяліся пагрозаў мучыцеля, і, прыйшоўшы шчыра да Хрыста, узялі пачэсны Крыж і, скончыўшы свой шлях, атрымалі перамогу з нябёсаў. Слава Таму, хто даў вам сілу, слава Таму, хто вянчаў вас, слава Таму, хто праз вас дзейнічае аздараўленьні.

Апярэдзіўшы роспач ніневіцянаў, Ты ўстрымаў прадказаную кару, і міласьць Твая, Госпадзе, перамагла Твой гнеў. Дык і цяпер зьмілуйся над людзьмі Тваімі і статкам Тваім, уладарнаю рукою перамажы нашых ворагаў, і дай нам, малітвамі Багародзіцы, веліч зьмілаваньня.

Вершапесьні

Чакае цябе, душа, іншы сьвет, і судзьдзя выявіць усе Твае таемныя і паганыя ўчынкі. Дык не заставайся ў дачаснасьці, але выперадзі Судзьдзю і ўсклікні: Божа, ачысьці і збаў мяне!

Не пагардзі мною, Спасе, апанаванага грахоўнай ленасьцю, але ўздымі мае думкі да пакаяньня, і ўчыні мяне руплівым працаўніком Твайго вінаградніка, дай заплату адзінаццатай гадзіны і веліч зьмілаваньня.

Воі вялікага Ўладара супрацівіліся наказам мучыцеляў, адважна пайшлі на мучэньні, патапталі ўсе спакусы, і былі дастойна вянчаныя, а цяпер просяць Збавіцеля даць супакой для душаў нашых і веліч зьмілаваньня.

Ты, адзіная Чыстая, была селішчам Сьвятла, што ад Айца зазьзяла. Таму клічу да Цябе: Прасьвятлі сьвятлом дабрадзейнасьцяў маю пацямнелую душу, і ў дзень суду пасялі яе, Усячыстая, у селішчы сьветласьці Тваёй.